अस्पतालबाट डिस्चार्ज भएका माओवादी उपमहासचिव वर्षमान पुनलाई स्वास्थ्य लाभका लागि एकान्तस्थलमा पुर्‍याइएको छ। केही हप्ता पूर्ण आराम गर्न चिकित्सकहरूले दिएको सल्लाहबमोजिम उनलाई बूढानीलकण्ठस्थित डाँडाको एउटा रिसोर्टमा लगिएको छ।

अस्पतालबाट निस्केको एक–दुई दिन स्वास्थ्यलाभको कामना भन्दै नियुक्ति, सरुवा, बढुवालगायत निजी काम भन्न आउनेको लर्को लागेपछि गुप्तबास रोज्न बाध्य हुनुपरेको स्रोतले जनाएको छ। यस्ता व्यक्तिबाट हुनसक्ने इन्फेक्सनलगायत कारण स्वास्थ्यमा झनै गम्भीर संकट आउन सक्ने खतरा बढेपछि गुप्तबास रोजिएको जनआस्थाले जनाएको छ।

चिकित्सकले कलेजो र मिर्गौला फेर्नुपर्ने अवस्था रहेको सार्वजनिक गर्दै स्वास्थ्य निकै गम्भीर रहेको जानकारी गराएका थिए। यसैबीच गरिएको एक परीक्षणमा भने कलेजोले काम गर्न थालेको जानकारीसँगै पुनले केही राहत अनुभव गरेको बताइन्छ। कलेजोले काम शुरु गरेपछि ट्रान्सप्लान्ट गर्नुपर्ने अवस्था हटेको श्रोतको दाबी छ।