नेपालीलाई नक्कली भुटानी शरणार्थी बनाएर अमेरिका पठाउने गिराेहसँग साँठगाँठ रहेकाे आराेपमा पक्राउ परेका एमाले सचिव एवम् पूर्व उपप्रधानमन्त्री टाेपबहादुर रायमाझीका छाेरा सन्दीप रायमाझीलाई जिल्ला अदालत काठमाडाैँमा उपस्थित गराइएकाे छ।

बुधबार साँझ बुटवलबाट पक्राउ परेका उनलाई बिहीबार बिहान काठमाडाैँ ल्याएर बयानकाे लागि जिल्ला अदालत काठमाडाैँमा उपस्थित गराइएकाे काठमाडाैँ प्रहरी परिसर प्रमुख एसएसपी दानबहादुर कार्कीले जानकारी दिए।

प्रहरीले शरणार्थी प्रकरणकाे काराेबार भएकाे आशंकामा सन्दीपकाे साथबाट केही हप्ता अगाडि डेढ कराेड बराबरकाे चेकसमेत बरामद गरेकाे थियाे।

यस प्रकरणमा प्रहरीले उनीसहित हालसम्म ९ जनालाई पक्राउ गरेर अनुसन्धान गरिरहेकाे छ। भने, पक्राउ पुर्जी जारी भएका टाेपबहादुर रायमाझीसहित अन्य तीन जना फरार छन्।