म्यान्मारको सत्तासीन ‘जुन्ता’ सेनाले गाउँमाथि अन्धाधुन्ध गोलाबारी बर्साउँदा हजारौँ स्थानीयहरू विस्थापित भएका छन्।

सैन्य सरकारले आइतबार र सोमबार पश्चिमी सागिङ क्षेत्रको ये–उ टाउनशिपमा दर्जनौँ पटक हवाई आक्रमण गर्दा दश हजारभन्दा बढी मानिसहरू घर छाडेर भागेका छन्।

स्थानीयकाअनुसार सेना समर्थक ‘अतिवादी समूह’ले तीन वर्षदेखि ये–उ टाउनशिपका गाउँ–गाउँहरूमा आतंक मच्चाइरहेका छन्। उनीहरूको सहयोगमा सैन्य सरकारले गाउँ–टोलमा गोलाबारी गरिरहेको प्रजातन्त्रवादी कार्यकर्ताहरूले जनाएका छन्। 

म्यान्मार सेनाले सोमबार गरेको हवाई आक्रमणमा परी दर्जनौँ ‘जुन्ता’विरोधी सदस्यहरूले ज्यान गुमाएका छन्। प्रजातन्त्रवादी कार्यकर्ताको मृत्युपछि गाउँमा सन्नटा छाएको छ।

‘सोमबार बिहान दश हजारभन्दा बढी गाउँलेहरू आफ्नो घर छोडेर भागेका छन्, किनभने सेनाका अधिकारीहरू गाउँमा आइरहेका छन्। धेरैलाई मारिसके। उनीहरूले दिनदिनै आक्रमण गरिरहेका छन्,’ पीडीएफ समूहका प्रवक्ताले भने।

ये–उ टाउनशिपमाका अधिकाशं स्थानीय बासिन्दाहरू दुई वर्षदेखि जंगलमा लुकेर बसिरहेका छन्। ये–उका दश गाउँका बचेखुचेका करिब दश हजार बासिन्दाहरू फेरि आइतबार आफ्नो घर छोडेर भागेका छन्।

सन् २०२१ मा भएको सैनिक विद्रोहपछि ये–उ टाउनशिपका ५१ गाउँमा ३४ हजारभन्दा बढी घर र दर्जनौँ विद्यालय म्यान्मारको ‘जुन्ता’ सेनाले जलाएको छ।

सैनिक फौजले गरेको आक्रमणबाट ६ वटा धार्मिक भवन पनि ध्वस्त भएका छन्। टाउनशिपमा दुई लाखभन्दा बढी मानिसहरूलाई मानवीय सहायता चाहिएको स्थानीय अधिकारीहरूले जनाएका छन्।