विगत केही समयदेखि सामाजिक सञ्जाल र सञ्चारमाध्यममा जबर्जस्त छाएका पात्र हुन् नवराजतन्त्रवादी झापाका मेडिकल व्यवसायी दुर्गा प्रसाईं । उसो त विवादित व्यवसायी प्रसाईं हिजोआज नै रातारात चर्चामा आएका पात्र भने होइनन् । नेकपा माओवादी केन्द्र र नेकपा एमाले मिलेर नेकपा बन्नुपूर्व नै केपी ओली र पुष्पकमल दाहाल प्रचण्डलाई मार्सी चामल खुवाएर चर्चामा आएका थिए ।

दुर्गा प्रसाईं लघुवित्त र बैंकको ब्याज नतिर्न विभिन्न दल र शक्तिकेन्द्र चहारेपछि अन्ततः उनले अभियान नै चलाएर नवराजावादी बने । र, मंसिर ७ मा गणतान्त्रिक व्यवस्था फालेर राजतन्त्र फर्काउने भन्दै केही मान्छेको भीडभाड राजधानीमा जम्मा पारेर चर्का नारा र भाषण गरेपछि अस्थायी रूपमा भए पनि थप चर्चाको शिखरमा छन् । र, उनी राजनीतिक शक्ति प्राप्तिको लागि आतुर र अति नै भोका देखिएका छन् ।