सभामुख देवराज घिमिरेले संसदको गतिरोध हटाउन राखेको बैठक निष्कर्षविहीन सकिएको छ।
सिंहदरबारस्थित सभामुखको कार्यकक्षमा प्रधानमन्त्रीसहित प्रमुख दलका शीर्ष नेताहरूबीच भएको छलफलमा नेपाली कांग्रेसले उपप्रधान तथा गृहमन्त्री रवि लामिछानेमाथि सहकारी प्रकरणको छानबिन गर्न संसदीय समितिको अडान कायमै राखेपछि बैठक निष्कर्षविहीन बनेको हो।
बैठकपछि कांग्रेसका प्रमुख सचेतक रमेश लेखकले भने, ‘हामीले संसदीय छानविन समितिको कुरा राखेको छौँ। सरकारले आगामी बैठकमा प्रस्तुत हुँदा सहकारी ठगीमा गृहमन्त्रीको पनि संलग्नता रहेका देखिएको छ। राजीनामा मागेका छैनौँ, प्रश्न उठेपछि संसदीय छानबिन समिति बनाउनुपर्छ भन्ने कुरा राखेका छौँ। सरकारले समिति बनाउँछ भन्ने विश्वास राखेका छौँ।’
उनले आगामी सदन चल्ने नचल्ने भन्ने कुरा सरकारको भूमिकामा निर्भर रहेने बताए। उनले अगाडि भने, ‘सदन चल्ने/नचल्ने, सरकार कसरी प्रस्तुत हुन्छ भन्नेमा भर पर्छ। हामीले सरकारप्रति अविश्वास गरेका छैनौँ। कोही नेता कानुन भन्दामाथि छ भन्ने सोच बनाउँदैन। प्रश्न उठेपछि सरकार आफैँले छानबिन गर्नुपर्छ भन्ने पक्षमा पुग्छ।’
बैठकमा प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली, राष्ट्रिय स्वतन्त्र पार्टीका सभापति रवि लामिछाने र राष्ट्रिय प्रजातन्त्र पार्टीका अध्यक्ष राजेन्द्र लिङ्देनसहित दोस्रो तहका नेताहरु सहभागी थिए।
