एसीसी प्रिमियर कप अन्तर्गत समूह चरणको आफ्नो अन्तिम खेलमा नेपाल हङकङसँग १५ रनले पराजित भएको छ।

हङकङले दिएको २६२ रनको लक्ष्य पछ्याएको नेपाल ४९.१ ओभरमा २४६ रन बनाउँदै अलआउट भयो।

नेपालका लागि इशान पान्डेले सर्वाधिक ९० रन बनाए। आसिफ शेखले ४४, दिपेन्द्रसिंह ऐरीले २५, करण केसीले २१ तथा गुल्शन झाले २० रन बनाए।

बलिङमा हङकङका लागि एइजाज खानले ४ विकेट लिँदा यासिम मुर्तजाले २ र किन्चित शाह, नसरुल्ला राना र अतिक इक्बालले १–१ विकेट लिए।

त्यसअघि बाबर हायातको शानदार शतकमा हङकङले नेपालविरुद्ध पूरै ५० ओभर खेल्दै ७ विकेट गुमाएर २६१ रन बनाएको थियो।

बाबरले अविजित ११७ रन बनाउँदा एहसान खानले ३४ रन र शाहिद वासिफले ४५ रन बनाए।

नेपालका लागि कप्तान सन्दीप लामिछानेले सर्वाधिक ४ विकेट लिए भने शेर मल्लले ३ विकेट लिए।

समूह चरणको अन्तिम खेल हारे पनि नेपाल यसअघि नै सेमिफाइनल प्रवेश गरिसकेको छ। नेपालसँगै हङकङ पनि सेमिफाइनल पुग्दा आयोजक मलेसिया भने बाहिरिएको छ।