बेलायतमा उखरमाउलो गर्मी छ । गर्मी छल्नका लागि बेलायतीहरू समुद्रकिनारमा जाने गर्थे । तर, यसपटक सिगल चराले ज्यानमारा आक्रमण गरेर त्यता जानै दिएको छैन ।

केही दिनयता डोरसेटको समुद्री तटमा आनन्द लिइरहेकामाथि सिगल चराले आक्रमण गरेको तस्बिर बेलायतमा भाइरल भएका छन् । 

आखिर के भयो सिगल चरालाई ? किन रिसायो ऊ मानिससँग यसरी ? यी र यस्तै प्रश्नहरू फालिम लागिरहेका छन् । अनुसन्धानकर्मी अध्येताहरू भन्छन् - यसको निम्तो मानिस आफैंले दिएको हो । उनीहरूको अध्ययनको निष्कर्ष छ- मानिसले फाल्ने खाद्यपदार्थ, समुद्र किनारमा हुने बस्ती विस्तार र ध्वनि प्रदूषणले उनीहरूमा रिस बढेको छ । अहिले त्यही रिस उनीहरू समुद्र किनारमा आउँने मानिस र ससाना जीवजन्तुमा पोखिरहेका छन् । 

मार्टिन क्याड बेलायतका नामुद चरा विशेषज्ञ हुन् । उनी ३० वर्षदेखि चराकै पछि लागिरहेका छन् । त्यसमा पनि धेरै समय त सिगलकै पछि लागेर बितेको छ । उनको विचारमा मानिसले समुद्र किनारमा खाद्यपदार्थ फ्याँक्नु नै सिगल रिसाउनुको प्रमुख कारण हो । 

उनका अनुसार अर्को कारण ऊ शान्त वातावरणमा यौनक्रिडा गर्न रूचाउँछ । त्यसो भयो भने मात्र उसले सन्तान उत्पादन गर्न सक्छ । तर, यतिबेला समुद्रकिनारसम्मै मानव वस्ती बढेर उसले रमाएर यौन क्रिडा गर्न पाएको छैन । यौनक्रिडाका बेला बाधा पुर्याएपछि उसको रिस अरू बढेको छ । 

रोयल सोसाइटी फर द प्रोटेक्सन अफ बर्डसले भनेको छ- समुद्रमा खानेकुरा नफाल्ने र यौनक्रिडाका लागि शान्त वातावरण बनाइ दिने हो भने सिगल रिसाउन छोड्छ । त्यसपछि मात्र मानिस गर्मी छल्न समुद्रकिनार जान सक्छन् ।