शहिद स्मारक ए डिभिजिन लिगमा सोमबार दुई खेल हुँदैछ।

पहिलो खेलमा ब्रिगेड ब्वाईज क्लब र संकटा क्लब भिड्दैछन्। दोस्रो खेलमा आर्मी र च्यासल युथ क्लब खेल्नेछन्। ब्रिगेड र संकटा पहिलो खेलमा सातदोबाटोस्थित एन्फा कम्प्लेक्समा मध्यान्न १२ बजे भिड्नेछन्। 

सोमबार संकटाका नियमित कप्तान रवि सिलवाल मैदान फर्कने छन्। चोटका कारण करिब ३ साता उनी मैदान बाहिर रहेका थिए। लिगमा ६ खेलमा २ जित, २ बराबरी र २ हार सहित ८ अंक जोडेर तालिकाको आठौं स्थानमा रहेकाे संकटा बिबिसीलाई पराजित गर्दै शीर्ष ६ मा रहने योजनामा छ।

यता राष्ट्रिय टिमका पुर्व कप्तान अनिल गुरुङको कप्तानीमा रहेको बिबिसी २ जित, ३ हार र १ बराबरी गर्दै ७ अंक जोडेर तालिकाको दशौं स्थानमा छ।

दोस्रो खेलमा आर्मी र च्यासल दिउँसो ३ बजे दशरथ रंगशालामा खेल्नेछन्।

संकटाविरुद्ध आर्मीले जित निकाल्न नसक्दा उसले लिगको शीर्षस्थानमा उक्लिने अवसर गुमाएको थियो। कम्तिमा बराबरीको नतिजाले समेत आर्मीलाई शीर्ष स्थानमा पुर्याउनेछ। आर्मीको ६ खेलबाट १३ अंक रहेको छ।

यता, सुरुवाती दुई खेलमा राम्रो प्रदर्शन गरेको च्यासल भने रेलिगेशन जोनको नजिक छ।

उसले ६ खेलबाट ६ अंक बटुल्दै तालिकाको १२ औं स्थानमा छ।