दाजुभाइले एउटै स्त्री भित्र्याउने चलन उपल्लो मुस्ताङका टासी स्याङ्बो गुरुङलाई पटक्कै चित्त बुझ्दैनथ्यो। तर, बहुपति वैवाहिक परम्पराको जन्जीरले बाँधिएका उनी चाहेर पनि उम्कन सकिरहेका थिएनन्। विद्रोहको झिल्को उठाए पैतृक सम्पत्तिबाटै बेदखल हुनुपर्थ्याे। भएकै जमीन परिवारै मिलेर खोस्रँदा ६ महीना समेत खान नपुग्ने हिमाली भेगमा त्यही सम्पत्ति पनि गुमाउनु टेक्ने हाँगो नै भाँचिनु बराबर थियो। तर, २०७७ सालमा गुरुङले साहस देखाए। भाउजूसितको दाम्पत्य सम्बन्ध तोडे। पैतृक सम्पत्ति त्यागिदिए। गुरुङलाई यस्तो बल दिएको थियो- अन्नपूर्ण संरक्षण क्षेत्र आयोजना (एक्याप)को जागीरले।