काठमाडौंमा दुखजिलो गरिरहेका एक युवक छोराछोरी र श्रीमती छोडेर भारततिर लाग्छन्, कामको खोजीमा। काम त पाउँछन्, तर समयमा पैसा पाउँदैनन्। लामो समयसम्म काठमाडौं खबर पठाउन पाउँदैनन्, उतै अलमलिन्छन्।

जब काठमाडौं फर्किन्छन्, छोराछोरी र श्रीमतीको अत्तोपत्तो मिल्दैन। जुन कोठामा बस्थे, छोडिसकेका हुन्छन्। आफन्त, साथीभाइ, चिनजान जतिका मान्छेसँग सोधपुछ गर्छन्, कुनै सुराक पाउँदैनन्। र, आफ्नै संसारमा हराउँछन्।

त्यसको ठीक २४ वर्षपछि युरोपबाट छोरी आउँछिन्, भेटघाट हुन्छ। छोराछोरी, श्रीमती जिउँदै रहेको बल्ल थाहा पाउँछन्।

यो कथा होइन, कास्कीका नारायण ढकालको जीवन भोगाइ हो। छोरी भेटेपछिको उनको दैनिकी कसरी चल्दो हो? उनलाई जीवन कस्तो लाग्दो हो? आउनुहोस्, पोखराको यात्रा गरौं।

प्रायः घुमफिरमै व्यस्त हुने नारायण ढकाल आज भने पोखराको महतगौडास्थित घरमै छन्। जेठी छोरीज्वाइँ घरमा आएका छन्। छोरीज्वाइँ पहिलो पटक घरमा आएका हुन्।