सिनामंगलबाट बरामद सय किलो भनिएको सुनको परिणाम ६० केजी ७१६ ग्राम रहेको पाइएको छ।

गालेपछिको सुनको कुल वास्तविक तौल ६० किलो ७१६ ग्राम कायम भएको राष्ट्र बैंकको टक्सार विभागका प्रमुख थानेश्वर आचार्यले बताए।

मोटरसाइकलको ‘ब्रेक शु’मा हङकङबाट तस्करी गरी नेपाल ल्याइएको उक्त सुन यही साउन २ गते त्रिभुवन विमानस्थलबाट राजस्व अनुसन्धान विभागको टोलीले बरामद गरेको थियो।

बरामद गरिएको उक्त सुन २९ दिनपछि ‘ब्रेक शु’बाट छुट्याएर तौलिएको हो। सुनको गुणस्तरबारे अन्तर्राष्ट्रिय मापदण्डअनुसार जाँच गरेर एक हप्तापछि मात्रै सार्वजनिक गरिने विभागले जनाएकाे छ।

अहिलेसम्मकै ठुलाे परिणाममा भएकाे याे सुन तस्करीकाे अनुसन्धान सुरु राजस्व अनुसन्धान विभागले गरेकाे भएपनि हाल नेपाल प्रहरीकाे केन्द्रीय अनुसन्धान व्यूराे (सिआइबी)ले गरिरहेकाे छ।

यस प्रकरणमा हालसम्म १८ जना पक्राउ परेका छन्।

याे सुन कसले नेपाल भित्र्याएकाे हाे भन्ने वास्तविकता अहिलेसम्म खुलेकाे छैन।