अमेरिकामा एक करोड १० लाख हाराहारीमा रहेका कागजपत्रविहीन आप्रवासीलाई सामुहिक देश निकाला गर्ने वाचा गरेर बिजयी ट्रम्पले त्यो वाचा पूरा गर्लान् त? अहिले अमेरिकाको लाखटक्काको प्रश्न नै यही भएको छ । यही प्रश्नमा यतिबेला अमेरिकी जनमत तीन कित्तामा बिभाजित छ,  पहिलो कित्तामा ट्रम्प समर्थकहरू छन् । उनीहरू यो वाचा पूरा हुन्छ भन्दै आप्रवासी निस्कासनको  काराभान हेर्ने दिन पर्खेर बसेका छन् । दोस्रो कित्तामा डेमोक्रेटहरू छन्, उनीहरू यो सम्भव नै छैन भन्दैछन् । तेस्रो कित्तामा केही त पक्कै हुन्छ भन्नेहरू छन् । 

यसैबीच ट्रम्पले दोस्रो विश्वयुद्धका बेला इटालियन, जर्मन, र जापानी आप्रवासीहरूको निगरानी र हिरासतका लागि प्रयोग भएको १७९८ को एलियन र सेडिशन एक्ट प्रयोग गरेर भए पनि आप्रवासीहरूलाई देशनिकाला गर्ने प्रतिज्ञा गरेका छन्। यसक्रममा उनले  देशमा आपतकालिन अवस्था घोषणा गरेर सैनिक परिचालन गर्नेसमेत बताएका छन् । उनले महान्यायाधिवक्ता, सीमा मामिला प्रमुख र गृह प्रशासनमा जे जस्ता दक्षिणपन्थी नामहरू प्रस्ताव गरेका छन्, ती सबैको पृष्ठभूमीलाई हेर्दा ट्रम्प आप्रवासीहरूको सामुहिक निस्कासनबाट पछाडि नफर्कने संकेत मिलेको छ ।  

ट्रम्प दुई करोड आप्रवासीलाई सामुहिक रूपमा देश निकाला गर्ने भन्दै आएका छन् । एक करोड १० लाख मात्र कागजपत्रविहीन भएको वर्तमान अवस्भथामा बाँकि ९० लाख आप्रवासी कहाँबाट जुटाउँछन् भन्ने प्रश्न पनि उठेको छ । कतै उनले टीपीएसमा बसेकालाई मात्र हैन, ग्रीनकार्ड र एच वन स्टाटस भएकाहरूलाई पनि देश निकाला गर्न लागेका त हैनन् भन्ने आशंका पनि जन्मिएको छ । सामान्यत:  पूर्व अनुमान नै गर्न नसकिने चाल चाल्ने स्वभावका ट्रम्पले के गर्छन् भन्दा पनि के गर्दैनन् भन्ने स्थिति छ । 

अमेरिकामा रहेका कागजपत्रविहीनहरू धेरै जसो दक्षिणी अमेरिकी देशहरूका हिस्पानिक मूलका मानिसहरू छन् । उनीहरू अमेरिकामा तल्लो तहको नभइनहुने भरपर्दा कामदार हुन् । यदि उनीहरूलाई सामुहिक रूपमा बाहिर पठाइयो भने अमेरिकामा सडक निर्माण र मर्मत गर्ने, घर निर्माण, मर्मत र सफा सुग्घर गर्ने, भाडा बर्तन माझ्ने कामदारको ठूलो अभाव भई हाहाकार नै हुन सक्छ । 

हुन त अहिले नै अमेरिकामा पनि एक करोड ३० लाख कामदारको अभाव छ भनिन्छ । त्यो एक करोड १० लाखलाई सामुहिक रूपमा देश निकाला गर्ने हो भने दुई करोड ४० लाख कामदारको अभाव हुन्छ । एकातिर अमेरिकामै उत्पादित सामान मात्र प्रयोग गर्ने मेक इन अमेरिका अभियान चलाउने भनिएको छ अर्कोतिर कामदार नै नहुने अवस्था छ । यस्तो परस्परविरोधी परिस्थिति सिर्जना हुने भएकाले ट्रम्पको सामुहिक निस्कासनको चुनावी वाचा संशयमा छ ।