सन् २०२३ मा १८ हजार दुईसय ४५ नेपालीले अमेरिकाको भिजिटर भिसा पाएका छन् । यो तथ्याङ्क अमेरिकी विदेश मन्त्रालय ब्यूरो अफ कन्सुलर अफेयर्सले प्रकाशित गरेको पछिल्लो प्रतिवेदनको हो । प्रतिवेदनका अनुसार यो संख्या भिजिटर भिसा आवेदन गर्ने कुल संख्याको ६८.७ प्रतिशत हो ।

प्रतिवेदनअनुसार २६ हजार पाँचसय नेपालीले भिजिटर भिसाका लागि आवेदन गरेका छन् र आवेदन दिनेमध्ये दुई-तिहाईभन्दा बढीको भिसा स्विकृत भएको छ ।

अझ, सन् २०२२ मा ८०.१५ प्रतिशत नेपाली भिजिटर भिसा आवेदकको भिसा स्विकृत भएको थियो । त्यो वर्ष भिजिटर भिसाका लागि आवेदन दिने २२ हजार सातसय २९मध्ये १८ हजार दुईसय १४ नेपालीको भिसा स्वीकृत भएको थियो ।

त्योभन्द अघिल्लो वर्ष भिसा स्विकृत प्रतिशत अझ बढी थियो । ८१.२८ प्रतिशतले भिजिटर भिसा पाएको त्यो वर्ष कोभिड कहरका कारण आठ हजार सात सय ७३ नेपालीले मात्र आवेदन दिएकोमा सातहजार एकसय २८ नेपालीले भिजिटर भिसा पाएका थिए ।

पछिल्लो तीन वर्षको तथ्यांकलाई आधार मान्दा ४३ हजार पाँचसय ८७ नेपालीले अमेरिकाको भिजिटर भिसा पाएका छन्। यो संख्या औसतमा कुल आवेदकको ७६.७१ प्रतिशत हुन्छ ।

माथिको तथ्याङक्लाई विश्लेषण गर्दा हरेक वर्ष लाखौं नेपालीले अमेरिकाको भिजिटर भिसाको आवेदन गर्छन् र आवेदन दिनेमध्ये धेरैजसोको भिसा अस्विकृत हुन्छ भन्ने दुबै खाले बजार-चर्चालाई गलत सावित गरिदिएको छ । तीन वर्षमा भिसा आवेदन गर्नेको संख्या ५८ हजार दुई मात्र रहेको छ भने पाउँनेको औसत संख्या एकसयमा ७६ रहेको छ । यसले के देखाउँछ भने बजारमा चर्चा चलेजस्तो न वर्षमा लाखौं नेपालीले अमेरिकाको भिजिटर भिसाका लागि आवेदन गर्छन् न आवेदन दिनेमध्ये धेरैको भिसा नै अस्विकृत हुन्छ ।