सामाजिक सञ्जालमार्फत अश्लिल भिडियोहरू सार्वजनिक गरिदिने भन्दै धम्की दिने पूर्वप्रेमीका साथी पक्राउ परेका छन्।

पक्राउ पर्नेमा ललितपुर महानगरपालिका-४ शान्तपुर्व मार्ग बस्ने २४ वर्षीय आयुष अधिकारी रहेका साइबर ब्यूरोका सूचना अधिकारी प्रहरी उपरीक्षक दिपकराज अवस्थीले जानकारी दिए।

यो पनि-

पीडित युवतीले आफ्ना प्रेमीलाई आफ्नो गोप्य भिडियो पठाउने गरेकी थिइन्। उनीहरूको सम्बन्ध टुटेपछि प्रेमीका साथी अधिकारीले भिडियो देखाउँदै युवतीलाई ब्ल्याकमेल गर्न थाले।

अधिकारीले युवतीसँग पैसा माग्ने, आपत्तिजनक शब्दहरू प्रयोग गरी शारीरिक सम्पर्क राख्न बोलाउने र नआएमा उक्त भिडियो सामाजिक सञ्जालमा हालि भाईरल गरिदिन्छु भन्दै धम्क्याउने गरेको भन्दै युवतीले प्रहरीमा उजुरी दिएकी थिइन्।

नेपाल प्रहरीको साइबर ब्यूरोको प्राविधिक विश्लेषणमा उक्त कार्यमा अधिकारीको संलग्नता खुल्न आएपछि उनी पक्राउ परेका हुन्।

उनीविरुद्ध विद्युतिय (इलेक्ट्रोनिक) कारोबार ऐन, २०६३ अन्तर्गतको कसुरमा अदालतबाट चारदिनको म्याद लिएर प्रहरीले अनुसन्धान गरिरहेको छ।