नेपाली कांग्रेसका महामन्त्री विश्वप्रकाश शर्माले पूर्वराजा ज्ञानेन्द्र शाहलाई ०८४ सालको निर्वाचनमा ‘श्रीपेच चुनाव चिह्न’ लिएर  दुई तिहाइ जनमत ल्याएर राजतन्त्र फर्काउन चुनौती दिएका छन्।

शनिबार झापाको मेचीनगर धुलाबारीमा पार्टीको क्षेत्रीय प्रशिक्षण कार्यक्रममा उनले चुनावबाट जनमत सावित गरेर चाहे जस्तो व्यवस्था ल्याउन पूर्वराजालाई चुनौती दिएका हुन्।

उनले भने, ‘०८४ सालमा चुनाव हुँदैछ। यदि तपाईंलाई आफूसँग जनता छन् भन्ने लागेको छ भने ‘श्रीपेच चुनाव चिह्न’मा मत माग्नुहोस्। दुई तिहाइ ल्याएर जनता आफूसँग भएको देखाउनुहोस्, अनि संविधान संशोधन गरेर चाहेको व्यवस्था गर्नुहोस्, तर त्यसबाहेकका उपायद्वारा देशलाई अराजकतातिर लिने प्रयास स्वीकार्य हुँदैन।’

उनले सडकमा केही समर्थक उतार्दैमा राजावादीले संविधानसभाको निर्णय उल्ट्याउन नसक्ने टिप्पणी गरे। नेपाली जनताले ‘कुन वंशको गर्भबाट जन्मेको?’ भन्ने आधारमा नभई ‘कस्तो कर्म गरेको?’ भन्ने आधारमा आफ्ना प्रतिनिधि चुन्ने गरेको उल्लेख गरे।

शर्माले भने, ‘हिजो राजाको पालामा जस्तो संविधान संशोधनको अधिकार कसैको हुकुम र हातमा नभएको हेक्का राख्न मेरो चेतावनी छ। सडकमा मान्छे उतार्दै आकाशतिर फर्केर मेरा जनता यति छन् र उति छन् भनेर अनुमान गरेको भरमा जनमत यकिन हुँदैन।’