आईसीसी विश्वकप क्रिकेट लिग–२ को यूएई शृङ्खलाको पहिलो खेलमा नेपालले अमेरिकाको सामना गर्दैछ।

खेल नेपाली समयअनुसार आइतबार बिहान ११ बजेर १५ मिनेटमा सुरु हुनेछ।

यूएई र अमेरिकाविरुद्धको शृङ्खलामा नेपाली टिम रोहित पौडेलको कप्तानीमा मैदानमा उत्रने छ। अमेरिकाविरुद्धको खेलमा नेपाली टिममा तीन परिवर्तन गरिएको छ।

सन्दीप जोरा, लोकेश बम र आदिल आलमलाई बाहिर राखेर भीम सार्की, शाहब आलम र अनिल साहलाई मौका दिइएको छ।

लिग–२ अन्तर्गत नेपाल, यूएई र अमेरिकाको शृङ्खला कात्तिक ९ देखि १९ गतेसम्म यूएईमा हुँदैछ। दोस्रो खेलमा नेपाल कात्तिक १३ गते यूएईसँग भिड्ने तालिका छ।

विश्वकप लिग–२ मा १६ खेल खेलेको नेपालले १२ अङ्क जोडेको छ। समान खेल खेलेको युएईको ६ अंक छ। तालिकामा नेपाल सातौं स्थानमा छ भने यूएई आठौं स्थानमा छ।

२० खेल खेलिसकेको अमेरिका २८ अङ्कसहित तालिकाको दोस्रो स्थानमा छ।