लन्डनका दुईतले राता बस यतिबेला 'नेपाल लाइफटाइम एक्सपेरियन्स' का पोस्टरहरु बोकेर दौडिरहेका छन् ।

नपालले अर्को वर्ष मनाउन लागेको नेपाल भ्रमण वर्ष २०२० मा एक लाख बेलायती पर्यटक नेपाल लैजानका लागि यी बसले नेपाल बोकेका हुन् । 

मध्य लन्डनका पार्लियामेन्ट स्क्वायर, वेस्टमिनिस्टर, ट्राफल्गर स्क्वायर, केन्सिङटन हाई स्ट्रिट, सेन्ट पल्सलगायतका महत्वपूर्ण दुई दर्जन रूटमा गुड्ने ५० बसले मंगलबारदेखि २ सातासम्म नेपाल बोक्नेछन् ।

यो अभियानको संयोजन बेलायतका लागि नेपाली राजदूत डा. दुर्गाबहादुर सुवेदीले गरिरहेका छन् । अहिले उनको नेतृत्वमा एक तयारी समितिले नै काम गरिरहेको बताइएको छ । 

सन् २०२० को नेपाल भ्रमण वर्ष सफल बनाउनका लागि गरिएको यो प्रचारलाई लिएर बेलायतको नेपाली डायस्पोराले मिश्रित प्रतिक्रिया दिएको छ । समर्थकहरूले राताो बसमा गर्नु नै ठुलो कुरा भएको बताएका छन् र यो प्रभावकारी हुनेमा शंका गर्न नै आवश्यक नरहेको बताएका छन् । उनीहरूको भनाइ छ- लण्डनको प्रतिष्ठाका रूपमा लिइने राता बसमा नेपाल देखिनु नै गौरवको कुरा हो ।

तर, यो प्रचार अभियानप्रति आलोचक रहेको पक्षको मत भने फरक छ । यस्तै एक आलोचक रहेका पत्रकार चिरन शर्मालाई यसको विरोध गर्न नै नपाइने अवस्था रहेको जस्तो लाग्छ । उनको विचारमा यो ठीक भएन भन्यो भने नेपाल विरोधीको छाप लाग्न सक्छ । उनी स्थानको भन्दा पनि विज्ञापन सामग्रीप्रति असहमत छन् । उनी भन्छन्- यसमा नेपाल भ्रमणवर्ष २०२० को विज्ञापनभन्दा पनि https://www.welcomenepal.com/ वेससाइटलाई प्रमोशन गरिएको छ  । त्यो वेवसाइट खोलेर कतिजनाले नेपालमा होटल, फलाइट, टुर (होलिडे प्याकेज) बुकिङ गर्न सक्नु भयो ? मैले फोटोहरु बाहेक अरु केही देखिन् । फोटोको लागि गुगलनै काफी छ ।' 

जे होस् यतिबेला लण्डनका राता बस नेपाल बोकेर गुडिरहेका छन् । त्यो देखेर नेपालीलाई खुशी नै लागेको छ । तर, यसको डिजाइन र सन्देशका बारेमा भने प्रश्न उठाउन नसकिने भने हैन ।