‘मेरो राष्ट्रवाद’

‘मेरो राष्ट्रवाद’

सदनको तालीले देखिने होईन राष्ट्रवाद

सडकको गालीले मेटिने होईन राष्ट्रवाद

यो त हृदय भित्र ढुकढुकीमा बसेको हुन्छ

कलमको कैचीले कहिल्यै रेटिँदैन राष्ट्रवाद!

 

आगोको ज्वालाले जलाउँदैन राष्ट्रवाद

बन्दुकको गोलीले गलाउँदैन राष्ट्रवाद

यो त रगतको नसा नसामा बगेको हुन्छ

आकासे खेतीले कहिल्यै पलाउँदैन राष्ट्रवाद !

 

दुःख र पीडामा पनि लुक्दैन राष्ट्रवाद

भोक र अनिद्रामा पनि भुक्दैन राष्ट्रवाद

यो त आँशुका थोपा भित्र लुकेर बसेको हुन्छ

खहरे खोला उर्लिएर कहिल्लै छेक्दैन राष्ट्रवाद!

 

देश प्रदेशको बासले रोकिँदैन राष्ट्रवाद

धन सम्पत्तिको आसले पोखिदैन राष्ट्रवाद

यो त हरेक पाईला पाईलामा अडिएको हुन्छ

तराजुमा राखेर कहिल्यै जोखिदैन राष्ट्रवाद!

 

नीति र वाद भित्र मात्र बस्दैन राष्ट्रवाद

धर्म र जात भित्र कहिल्यै पस्दैन राष्ट्रवाद

यो त आमाको दुध भित्र पहिल्यै पसेको हुन्छ

पहाडबाट पहिरो झै कहिल्यै झर्दैन राष्ट्रवाद!

 

सत्ता र भत्ताले मात्र बोक्दैन राष्ट्रवाद

हसियार हतौडाले मात्र ठोक्दैन राष्ट्रवाद

यो त पसिनाको गन्धसँगै बगिरहेको हुन्छ

च्यातिएको टोपीले कहिल्यै रोक्दैन राष्ट्रवाद!!

प्रकाशित मिति: May 23, 2020 13:17:28

प्रतिक्रिया दिनुहोस

सबै