आमा !
म बाँच्न चाहान्छु ।
म चाहेर पनि
किन बाँच्न नपाउनेँ आमा ? चेकअफ गर्दा
डाक्टरले छोरी छ गर्भमा
भनिदियोे
त्यसैले अब
मेरो हत्या हुन्छ ।
आमा !
मेरो रक्षा गर्नुहोस्
म बाँच्न चाहन्छु ।
म बुझ्छु आमा !
तिमीलाई आफ्नो अस्तित्वभन्दा
परिवार र समाज ठूलो लाग्छ ।
तिमीले आफ्ना चाहानाहरूलाई
जिउँदै मारेर
परिवारलाई खुशी राख्छ्यौ
छोराको चाहमा
के मेरो हत्या स्वीकार्छ्यौ आमा ?
आमा !
म हरदिन हजुरको
श्वास प्रश्वासको रफ्तारसँगै
धड्किन्छु, तिम्रो मुटुमा
निधारमा भाग्य नकोरिंदै
मृत्युरेखा नकोरिदेऊ न आमा !
म बाँच्न चाहन्छु ।
के छोरी हुनु पाप हो?
छोरा भाग्य हो भने
छोरी सौभाग्य हो ।
छोरा छोरा छोरा !
छोराले वंश बचाउँछ,
छोराले स्वर्गको ढोका खोल्छ,
छोराले पिण्डदान दिन्छ ।
भन त आमा !
के म छोरीमा ती गुण छैनन् र,
मलाई फालिदिन्छौ ?
आमा !
मेरो त गर्भमै हत्या हुन्छ
मलाई पनि यो संसार निहाल्नु छ ।
तिम्रो फुस्रो जिन्दगीमा
रङ्ग भर्नु छ आमा !
म बाँच्न चाहन्छु ।
जति आशाको किरण छोरामा छ,
त्यस्तै सयौं किरण
म पनि ल्याउने छु आमा !
म बाँच्न चाहन्छु...!
