तिमी फूल
म पनि फूल
फूल–फूलको युद्ध चलेको यो बेला
फूलद्वारा फूल शोषित भएको यो क्षण
फूलले फूलहरूको हत्या गरिरहेको बखत
फूलहरूसँग सक्दो जोगिनु छ मैले
तिमी फूल
म पनि फूल
मलाई फूल मनपर्छ
तर माफ गर्नुस्
आस्थाको यो मन्दिरमा
चढाउन सक्दिन म कुनै फूल
गुलाबहरू धारिला भएका छन्
सुनाखरी र लालुपाते आगो भएका छन्
लालीगुराँस रक्ताम्मे भएको छ
म फूल हुँ
र मलाई पनि रहर छ
फूलसँग संसर्ग गरेर
जीवनका सबै रङहरू फुल्ने
सुरम्य बगैँचा निर्माण गरुँ
फुल्न सकुँ अप्ठ्यारा कुइनेटाहरूमा
मगमगाउन सकुँ
खेताला, ढाक्रे, पँधेर्नी र हलीहरूका
थकान र दुःखका विरुद्ध
म फूल हुँ
मन लागेको छ
तमाम यात्रीहरूको गन्तव्यमा
फूलैफूलको स्वागतद्वार बनूँ
रङहरू भर्न सकुँ
विधवाको श्वेत पहिरनमा
हावालाई छोडिजाऊँ मगमगाउने बासना
म फूल हुँ
तर, फूल–फूलको युद्ध चलेको यो बेला
फूलद्वारा फूल शोषित भएको यो क्षण
फूलले फूलहरूको हत्या गरिरहेको बखत
फूलहरूसँग सक्दो जोगिनु छ मैले
