स्वतन्त्र विद्यार्थी युनियन (स्ववियु) निर्वाचनको रौनक देशभरका क्याम्पसहरुमा छाइरहेको बेला रोल्पाका दुई क्याम्पसमा पनि चुनाव लागेको छ।

सदरमुकाम लिबाङमा रहेको जलजला बहुमुखी क्याम्पस र जुँगारस्थित नवनेपाल क्याम्पसमा चुनाव हुन लागेको हो। 

मध्यपश्चिम विश्वविद्यालयको आंगिक रहेको जलजलामा चैत ३ र त्रिभुवन विश्वविद्यालयबाट सम्बन्धन रहेको नवनेपालमा चैत ५ गते चुनाव हुँदैछ। जसका लागि कांग्रेस निकट नेपाल विद्यार्थी संघ र एमाले निकट अनेरास्ववियुबीच तालमेल हुँदा माओवादी र विप्लव निकटका अखिल क्रान्तिकारी विद्यार्थी संगठनबीच गठबन्धन भएको छ। 

जलजलामा नेविसंघ र माओवादी निकट अखिल क्रान्तिकारीबीच प्रतिष्पर्धा हुँदा नवनेपालमा अनेरास्ववियु र विप्लव निकटको अखिल क्रान्तिकारीबीच चुनावी प्रतिष्पर्धा हुँदैछ।

जलजला क्याम्पसमा नेविसंघका दिपक विष्टको नेतृत्वमा अनेरास्ववियु र अखिल छैटौंका विद्यार्थीहरुको प्यानल बनेको छ भने अखिल क्रान्तिकारीका उमेश पुनको नेतृत्वमा अर्काे अखिल क्रान्तिकारी विद्यार्थी संगठनको प्यानल चुनावी प्रतिष्पर्धामा छन्।

यस्तै नवनेपाल क्याम्पस जुँगारमा अनेरास्ववियुका एकराज डाँगी नेतृवको प्यानल र विप्लव निकटको अखिल क्रान्तिकारीका खुमराज थापा नेतृत्वको प्यानल चुनावी मैदानमा छन्। 

दुबै प्यानलले आफूहरुले जीत्ने दावी गरिरहँदा परिणाम कस्को पक्षमा आउँछ त्यो भने चुनावी नतिजा देखाउने छ।