नेपाली चलचित्र क्षेत्रमा नयाँ पुस्ताकी आकर्षक र सम्भावनाशील कलाकारका रूपमा उदाएकी बिनिता कार्की अहिले फिल्म ‘पीआर’ मार्फत चर्चामा छिन्।

मोडलिङबाट आफ्नो करिअर सुरु गरेकी बिनिताले पछिल्लो समय अभिनयमा पनि प्रभावशाली उपस्थिति जनाउँदै दर्शकमाझ छुट्टै पहिचान बनाउन थालेकी छन्।

हालै सार्वजनिक गरिएको उनको नयाँ फोटोसुटले सामाजिक सञ्जालमा निकै चर्चा बटुलेको छ। गाढा निलो रंगको आकर्षक ट्रान्सपरेन्ट गाउनमा देखिएकी बिनिता आत्मविश्वासी, स्टाइलिस र बोल्ड अवतारमा प्रस्तुत भएकी छन्। कालो पृष्ठभूमिमा गरिएको फोटोसुटका विभिन्न पोजले उनको फेसन सेन्स, अभिनय अभिव्यक्ति र व्यक्तित्वलाई झनै आकर्षक बनाएको देखिन्छ।

तस्बिरहरूमा बिनिताको आत्मविश्वासपूर्ण प्रस्तुति, सौम्य मुस्कान र मोडलिङ पोजले उनी अभिनेत्री मात्र नभई आधुनिक फेसन आइकनको रूपमा पनि स्थापित हुँदै गएको संकेत गर्छ । खुलेको लामो कपाल, हल्का मेकअप र आकर्षक पहिरनले उनको ग्ल्यामरलाई अझ निखारेको छ।

फिल्म ‘पीआर’ अष्ट्रेलियामा रहेका नेपाली युवाहरूको संघर्ष, सपना, पीडा र वास्तविक जीवन कथामा आधारित चलचित्र हो। विदेशिने नेपाली युवाले भोग्ने मानसिक तनाव, परिवारबाट टाढा रहँदाको पीडा र भविष्य निर्माणको संघर्षलाई फिल्मले यथार्थपरक ढंगले उठाएको बिनिताले बताएकी छन्।

रेखा थापा, झरना थापा र निरुता सिंहजस्ता चर्चित अभिनेत्रीबाट प्रेरणा लिँदै हुर्किएकी बिनिताले सानैदेखि अभिनय क्षेत्रमा केही गर्ने सपना देखेकी थिइन्। त्यही सपना पछ्याउँदै उनी अहिले नेपाली चलचित्र क्षेत्रमा सक्रिय र चर्चित बन्दै गइरहेकी छन्।

निर्देशक शोभित बस्नेतको निर्देशन रहेको ‘पीआर’ मा मुख्य भूमिकामा अभिनय गर्न पाउँदा आफू निकै उत्साहित भएको बिनिताले बताएकी छन्। यो फिल्म आफ्नो अभिनय यात्रा र करिअरका लागि महत्वपूर्ण मोड बन्ने विश्वास उनले व्यक्त गरेकी छन्।

मोडलिङ र अभिनय दुवै क्षेत्रमा एकसाथ अघि बढिरहेकी बिनिता कार्कीलाई अहिले नेपाली फिल्म उद्योगकी उदाउँदी तथा सम्भावनायुक्त कलाकारका रूपमा हेरिन थालिएको छ। उनका नयाँ तस्बिर र फिल्म ‘पीआर’ ले दर्शकमाझ उनको लोकप्रियता झन् बढाइरहेको छ।