कर्णालीको उचाई र जुम्लाली संस्कृतिको गहिराइलाई पहिलोपटक राष्ट्रिय स्तरमा गुञ्जाउने प्रयास सुरु भएको छ।

नेपाली भाषाको उद्गमस्थल जुम्लामा ‘जुम्ला आइडल’ आयोजना हुँदैछ, जसमा झ्याउरे भाका, देउडा, लोकसंगीत, परम्परागत नृत्य र भेषभूषाले मञ्च रंगिनेछन्।

कार्यक्रम ‘जुम्ला आइडल— डान्सिङ एन्ड सिंगिङ’ भदौ र असोज महिनामा खलंगामा हुनेछ। आयोजक टिमका तुलराज गिरीका अनुसार, जुम्लाको दुर्गम भौगोलिक अवस्था र सीमित अवसरका बाबजुद यहाँका युवामा लुकेका प्रतिभा अद्भुत छन्।

‘हाम्रो लक्ष्य गाउँ–गाउँको स्वर र नृत्यलाई राष्ट्रिय तथा अन्तर्राष्ट्रिय स्तरमा पुर्‍याउनु हो,’ उनले भने।

कार्यक्रम आयोजनाका लागि करिब २० लाख लागत लाग्ने अनुमान गरिएको छ र कर्णालीका संघसंस्था, समाजसेवी, व्यवसायी तथा शुभेच्छुकसँग सहयोगको अपेक्षा गरिएको छ।

विजेताले २ लाख २२ हजार २२२ रुपैयाँ नगद पुरस्कार पाउनेछन्। 

आइतबारदेखि आवेदन खुल्ने र प्रतियोगिता खलंगामै सम्पन्न हुने आरकेबी इन्टरटेन्मेन्ट हाउसका निर्देशक राजकुमार वैश्यले जानकारी दिए।