मुगुको रारा ताल घुम्न जाँदै गरेको गाडी दुर्घटना हुँदा तीन जनाको मृत्यु भएको छ। दुर्घटनामा दुई जना गम्भीर घाइते भएका छन्।

काठमाडौंबाट रारा जाँदै गरेको बागमती प्रदेशको बा १७ च १८६४ नम्बरको टोयोटा गाडी छायाँनाथ रारा नगरपालिका–७, टोप्लास्थित रारा जाने सडकखण्डको जिमाकाँरा भिरबाट करिब ६ सय मिटर तल खसेर दुर्घटना भएको हो।

जिल्ला प्रहरी कार्यालय मुगुका प्रहरी नायब उपरीक्षक रविराज थपलियाका अनुसार गाडीमा चालकसहित पाँच जना सवार थिए। तीमध्ये तीन जनाको घटनास्थलमै मृत्यु भएको छ भने एक पुरुष र एक महिला गम्भीर घाइते भएका छन्।

प्रहरिका अनुसार मृत्यु हुनेमा काठमाडौं बस्ने ५० वर्षीय विजय बस्नेत, ५४ वर्षीय रमेश बिडारी र ५० वर्षीय पूर्णकुमार थापा छन्।

तीनै जनालाई जिल्ला अस्पताल मुगु ठिनी पुर्‍याउनासाथ चिकित्सकले मृत घोषणा गरेका हुन्। दुर्घटनामा ललितपुरकी ५४ वर्षीया अन्जु थापा र ५८ वर्षीय जिप चालक कञ्चन थापा घाइते भएका छन्।

घाइते दुवै जनालाई तत्काल उद्धार गरी उपचारका लागि जिल्ला अस्पताल पठाइएको प्रहरी नायब उपरीक्षक थपलियाले जानकारी दिए।

दुर्घटनाको कारण र घटनाबारे थप विवरण आउन बाँकी रहेको प्रहरीले जनाएको छ।