जिल्ला अदालत कास्कीले पोखराको सूर्यदर्शन सहकारी ठगी प्रकरणमा पूर्वअध्यक्ष ज्ञानबहादुर बम्जनलाई १० लाख रुपैयाँ धरौटीमा छाड्न आदेश दिएको छ।

आइतबार कास्की जिल्ला अदालतमा उपस्थित भएका बम्जनलाई न्यायाधीश शंकरबहादुर राईको इजलासमा बयान र थुनछेक बहसपछि १० लाख रुपैयाँ धरौटीमा छाड्न आदेश भएको हो।

अदालतले माग गरेको धरौटी तिरेर बम्जन छुटेका अदालतका सूचना अधिकारी दामोदर आचार्यले बताए।

सहरकारी ठगीमा पक्राउपूर्जी जारी भएपछि फरार भएका बम्जन आइतबार अदालतमा हाजिर भएका थिए। उनको आजै बहस र थुनछेकपछि धरौटीमा छाड्ने आदेश भएको हो।

पूर्वअध्यक्ष बम्जन सहकारी ठगी प्रकरणका मुख्य योजनाकार तथा पूर्वअध्यक्ष गितेन्द्रबाबु (जीबी) राईका जेठान हुन्।

सोही सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछानेविरुद्ध गत पुस २५ गते ६५ लाख रुपैयाँ धरौटी माग भएको थियो।