काठमाडौं महानगरपालिकाले धनुषा डिस्टिलरी प्रालिद्वारा उत्पादित ‘मुस्ताङ गोल्ड’ नामक अल्कोहलजन्य पेय पदार्थमा अखाद्य वस्तु भेटिएपछि दुई लाख जरिवाना तिराएको छ।

सिलबन्दी गरी बजारमा बिक्री वितरण भइरहेको उक्त मदिरामा झिँगा फेला परेपछि महानगरले उद्योगलाई जरिवाना तिराएको हो।

गत भदौ ४ गते उपभोक्ता आफैं महानगर प्रहरी बलको सम्पर्कमा आएर उजुरी गरेका थिए। उजुरीपछि महानगरको कृषि तथा पशुपंक्षी विभागले उक्त मदिराको नमुना सङ्कलन गरी भौतिक जाँच गरेको थियो। जाँचका क्रममा सिलबन्दी बोतलभित्र अखाद्य तत्त्व फेला परेको पुष्टि भएको विभागले जनाएको छ।

महानगरको बजार व्यवस्थापन तथा अनुगमन ऐन, २०७५ को दफा १०(३)(ढ) अनुसार यो कार्य अनुचित व्यापारिक गतिविधि मानिएको र ऐनको दफा २९(घ) र दफा ३०(१)(ख) बमोजिम धनुषा डिस्टिलरी प्रालिले कानुन उल्लङ्घन गरेको ठहर गरिएको विभागले जनाएको छ।

जरिवाना रकम काठमाडौं महानगरपालिकाको राजस्व खातामा जम्मा गरिसकेपछि सोको जानकारी विभागमा पेस गर्नुपर्नेछ।