अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चीनफिङबीच आगामी साता भेटवार्ता हुने भएको छ।

ह्वाइटहाउसका अनुसार आगामी अक्टुबर ३०मा ट्रम्प र सी दक्षिण कोरियामा भेट्नेछन्।

दक्षिण कोरियामा आयोजना हुन थालेको एशिया प्यासिफिक इकोनोमिक को-अपरेसन (एपेक)को बैठकमा ट्रम्पलाई पनि निम्तो गरिएको छ। त्यही सम्मेलनमा सहभागी हुन आएका चिनियाँ राष्ट्रपति सी चीनफिनसँग उनले त्यहिँ भेट्नेछन्।

ट्रम्प दोस्रोपटक राष्ट्रपति भएपछि दुई नेताहरूबीच यो पहिलो भेट हो।

ट्रम्पले लगातार भन्सार कर वृद्धि गरिरहँदा दुबै देशबीच केही तनाव पनि उत्पन्न पनि भएको थियो। आगामी नोभेम्बरबाट अमेरिकाले चिनियाँ उत्पादनमाथि १०० प्रतिशत कर लगाउने घोषणा गरिसकेको छ।

हालैमात्र चीनले दुर्लभ खनिज पदार्थ रेअर अर्थको उत्खनन्, प्रशोधन र निर्यातमा कडा नीति लिएपछि चिनियाँ बजारमै निर्भर अमेरिकाले अष्ट्रेलियासँग नयाँ सम्झौता गरेको थियो।

खासगरी यसअघि ट्रम्पले यसैसाता रुसका राष्ट्रपति भ्लादिमर पुटिनसँग हंगेरीमा भेट्ने तय भएको थियो। युक्रेनसँगको युद्धअन्त्यका लागि ट्रम्पले पहिलादेखि नै पहल गर्दै आएका छन्। तर शान्तिका लागि पुटिनमा कुनै इच्छाशक्ति नभएको भन्दै ट्रम्प रिसाएका छन्।

पुटिनसँगको वार्ता स्थगित भएलगत्तै चिनियाँ राष्ट्रपतिसँग भेट तय भएको हो। रुसलाई चीनको पनि समर्थन रहँदै आएको छ।