नेकपा एमालेले केन्द्रीय कमिटीमा ४० वर्ष मुनिका युवाका लागि ४ दशमलब ९८ प्रतिशत कोटा छुट्याएको छ।

एमलेले आइतबार विधान संशोधन गरी ११औँ महाधिवेशनबाट ३०१ सदस्यीय केन्द्रीय कमिटी निर्वाचित गर्दैछ। जसमा प्रदेशगत प्रतिनिधित्व उपत्यकासहित सबै प्रदेशबाट एक/एक जना युवा आउनेछन्। सात प्रदेशबाट सात र उपत्यकाबाट एक गरी ८ युवा सदस्य आउनेछन्।

त्यस्तै खुला कोटामा युवाका लागि २, जनजाति आदिवासीतर्फ युवा २, मधेशीतर्फ युवा २ र दलिततर्फ १ युवा निर्वाचित हुनेछन्। यसरी ३०१ सदस्यीय केन्द्रीय समितिमा १५ जना युवा सदस्य हुनेछन्।

गत शुक्रबारको सचिवालय बैठकमा एमाले सचिव योगेश भट्टराईले केन्द्रीय कमिटीमा १५ प्रतिशत युवाको सहभागिता सुनिश्चित गर्नुपर्ने प्रस्ताव गरेका थिए। योगेशको प्रस्ताव ठाडै अस्वीकार गरेका ओलीले १५ प्रतिशतको ठाउँमा १५ जना युवाको कोटा छुट्याइदिएका हुन्।