आगामी फागुन २१ गते हुने प्रतिनिधि सभा निर्वाचनका लागि एमालेले झापा क्षेत्र नम्बर ५ बाट प्रत्यक्षतर्फ अध्यक्ष केपी ओलीको एकल नाम सिफारिस गरेको छ।

शनिबार एमालेले झापाका ५ निर्वाचन क्षेत्रमध्ये ४ क्षेत्रका आकांक्षीहरूको नाम जिल्ला कमिटीमा सिफारिस गरेको हो। जसमध्ये झापा–५ मा मात्र एकल नाम सिफारिस भएको हो।

क्षेत्र नम्बर १ बाट रामचन्द्र उप्रेती, असारु राजवंशी, राजु कार्की, घनश्याम अधिकारीसहित सात जनाको नाम सिफारिस भएको छ। सो क्षेत्रबाट लक्ष्मी राई कृष्ण कनाल र निरु परियारको पनि आकांक्षी छन्।

झापा निर्वाचन क्षेत्र नम्बर २ बाट भने सभामुख देवराज घिमिरेसहित १३ जना आकांक्षी छन्। ती नामलाई सर्ट लिस्ट बनाएर भोलि मात्रै जिल्लामा सिफारिस गर्ने तयारी छ।

क्षेत्र नम्बर ३ बाट दीपक कार्कीसहित हरिबहादुर राजवंशी, वसन्त बानियाँ, सन्तलाल मेचे र देवेन्द्र आचार्यको नाम सिफारिस भएको छ।

त्यस्तै क्षेत्र नम्बर ४ बाट एलपी साँवा लिम्बू, हिराकुमार थापा र भोजकुमारी नेपालको नाम सिफारिस गरिएको छ।