एमाले महासचिव शंकर पोखरेल र नेकपा माओवादीका महासचिव नेत्रविक्रम चन्द ‘विप्लव’बीच चुनावी तालमेल गर्ने सहमति भएको छ।

दाङ-२ मा ‘चुनाव हारिने’ कार्यकर्ताको रिपोर्टिङपछि कालीकोटको प्रतिनिधि सभामा माओवादीका उम्मेदवारलाई सघाउने सहमति भएको हो।

माओवादी दाङका एक नेताका अनुसार माओवादीले पोखरेलसँगको सहमतिअनुसार नै दाङ–२ मा उम्मेदवार उठाएको छैन।

माओवादीले दाङ–२ मा १६ सय बढी पार्टी सदस्य र ५ हजार शुभेच्छुकसहित साढे ६ हजार बढी मतदाता रहेको दाबी गरेको छ।

कालिकोटमा एमालेले गत निर्वाचनमा पराजित भएका नगीन्द्र शाही (नेशनल)लाई टिकट दिएको छ। कालीकोटमा माओवादीले प्रवक्ता  खड्गबहादुर विश्वकर्मा ‘प्रकाण्ड’लाई उम्मेदवार बनाएको छ।

अब दाङमा पोखरेललाई सघाएपछि एमालेले प्रकाण्डलाई सघाउन कालिकोटका उम्मेदवार फिर्ता बोलाउनुपर्ने हुन्छ। तर, यस विषयमा एमाले नेताहरूले सार्वजनिक प्रतिक्रिया दिएका छैनन्।

माओवादी नेताहरूका अनुसार पोखरेलसँग भएको मौखिक सहमतिलाई केही दिनमै लिखित सहमति गर्ने तयारी छ।