पूर्वप्रधानमन्त्री डा. बाबुराम भट्टराईले आफ्नो उम्मेदवारी फिर्ता लिएका छन्। गोरखा निर्वाचन क्षेत्र नं २ बाट उम्मेदवारी दर्ता गराएका भट्टराईले शुक्रबार आयोगले निर्धारण गरेको समयभित्र उम्मेदवारी फिर्ता लिएका हुन्।

उनको सचिवालयले उम्मेदवारी फिर्ता लिएको बताएको छ। तर अब उनको समर्थन कसलाई रहन्छ भन्ने खुलाइएको छैन। यसअघि भट्टराईले चुनाव नलड्ने घोषणा गरेका थिए। तर अन्तिम समयमा उनलाई पार्टीले उम्मेदवार बनायो।

भट्टराईले प्रगतीशील लोकतान्त्रिक पार्टीका तर्फबाट उम्मेदवारी दिएका थिए।

शुक्रबार बिहानै रास्वपाका उपसभापति डा. स्वर्णिम वाग्लेले भट्टराईलाई उम्मेदवारी फिर्ता लिएर अभिभावक बन्न सुझाव दिएका थिए। आफ्नो निर्वाचन क्षेत्रका अरु युवाले समेत उम्मेदवारी फिर्ता लिन आग्रह गरेको भन्दै भट्टराई बिहानैदेखि त्यसबारे छलफलमा जुटेका थिए।

यो निर्वाचनमा क्षेत्रमा नेकपा एमालेका चक्रे मिलन, कांग्रेसका प्रकाशचन्द्र दवाडी तथा राष्ट्रिय स्वतन्त्र पार्टीका महामन्त्री कविन्द्र बुर्लाकोटीसहितका उम्मेदवारहरू मैदानमा छन्।