नेपाली कांग्रेसका निवर्तमान सभापति शेरबहादुर देउवाले पार्टी केही व्यक्तिहरूको कब्जामा परेको भन्दै सधैं यस्तो अवस्था नरहने बताएका छन्।

पत्नी डा. आरजु देउवा राणाको ६३औं जन्मदिनका अवसरमा महाराजगन्जस्थित निवासमा पुगेका कांग्रेस नेताहरूसँग देउवाले यो अवस्था सधैं नरहने भन्दै धैर्य गर्न आग्रह गरेका हुन्।

उनले नेताहरूसँग अहिलेको कठिन समय बितेर जाने बताएको महाराजगञ्ज पुगेका एक नेताले बताए। उनका अनुसार देउवाले वर्तमान सभापति गगन थापाले यसरी सबै सेटिङ मिलाएर भित्रभित्रै पार्टी कब्जा गर्लान् भन्ने सोच्दै नसोचेको बताएका छन्।

उनले चुनावको चटारोले पार्टी एकढिक्का राख्न पनि तत्काल थप निर्णय लिन नसकेको बताएका ती नेताले बताए। उनले तथाकथित विशेष महाधिवेशनबाट पार्टी गगनको कब्जामा गए पनि नियमित महाधिवेशनमा पार्टीको नेतृत्व आफूहरूमै फर्किने देउवाले नेताहरूलाई आश्वासन दिएका छन्।