राष्ट्रिय स्वतन्त्र पार्टीका सभापति रवि लामिछाने अहिले अस्पतालमा छन्। खुट्टामा लागेको चोट लामो समयसम्म सन्चो नभएपछि उनी त्रिभुवन विश्वविद्यालयको शिक्षण अस्पताल महाराजगञ्जमा भर्ना भएका हुन्।

बुधबार बिहान अस्पतालले एक विज्ञप्ति जारी गर्दै उनको अवस्था सार्वजनिक गरेको छ। उनको सचिवालयका अन्सार गत माघ ५ गते जनकपुरमा भएको चुनावी सभामा उनको देब्रे खुट्टामा चोट लागेको थियो। उक्त चोट भित्रिभागसम्म फैलिएपछि उनी अस्पताल भर्ना भएका हुन्।

‘औषधि सेवन गर्दा पनि सन्चो नभएर सेलुलाइटिस भएको कारणले यस अस्पतालको हाडजोर्नी विभागमा उहाँ भर्ना हुनुभएको र नशाबाट एन्टिबायोटिकमार्फत उपचार भइरहेको छ’ शिक्षण अस्पतालले भनेको छ ‘अहिले उहाँको अवस्था सामान्य रहेको छ।’

रविका स्वकीय अविनाश आचार्यका अनुसार चिकित्सकहरूले चोट गम्भिर नभएको तर संक्रमणको जोखिम भएका कारण अस्पतालमै भर्ना हुनुपरेको हो।

आगामी फागुन २१ को चुनावका लागि रास्वापले अहिले देशब्यापीरुपमा चुनावी अभियान निकै आक्रामक बनाएको छ। गत माघ ५ गते जनकपुरमा पहिलोपटक बालेन शाहलाई सम्बोधन गर्न लगाएर उसले चुनावी अभियान आरम्भ गरेको थियो।

काठमाडौं महानगरको मेयरबाट राजीनामा दिएर बालेन झापा ५ बाट चुनाव लड्दैछन्। रास्वपाले उनलाई बरिष्ठ नेता बनाएर भावी प्रधानमन्त्रीकारुपमा समेत प्रस्तुत गरेको छ। हाल रास्वपाको चुनावी अभियानका क्रममा बालेन पश्चिम नेपालका विभिन्न जिल्लाहरूमा छन्। यसअघि उम्मेदवारी दर्ता गराएर उनी पूर्वी नेपालका जिल्ला घुमेका थिए।

चुनावी अभियानमा बालेनमात्रै देखिएपछि सामाजिक सञ्जालमा रविका बारेमा बहस चल्न थालेको थियो।

‘चिकित्सकहरूको सुझावअनुसार पूर्ण उपचार र स्वास्थ्य सुधारपछि मात्र उहाँ पुनः नियमित राजनीतिक तथा सांगठनिक अभियानमा फर्किने जानकारी गराइन्छ’ उनको सचिवालयले भनेको छ ‘सभापतिज्यू सार्वजनिक रूपमा नदेखिनु भएको विषयमा चासो, चिन्ता तथा शुभेच्छा व्यक्त गर्नुहुने सबैमा हार्दिक धन्यवाद ज्ञापन गर्दछौं।’