मधेसका भिन्नभिन्न ठाउँबाट प्रहरीले दुईजना उम्मेदवारसहित उनिहरूका दर्जन कार्यकर्ताहरूलाई नियन्त्रणमा लिएको छ।

सिराहा- ३ का जनता समाजवादी पार्टीका उम्मेदवार अशेश्वर यादव र पर्सा-२ का नेकपा उम्मेदवार मनोज चौधरीलाई प्रहरीले नियन्त्रणमा लिएको हो।

मौन अवधिका बेला गाडीमा कार्यकर्तासहित ओहोर-दोहोर गरिरहेका उनिहरूलाई प्रहरीले रोकेर चेकजाँच गर्ने क्रममा गाडीमा शंकास्पद सामग्रीहरू फेला परेको प्रहरीले जनाएको छ। ती सामानका बारेमा प्रहरीले केही खुलाएको छैन।

यादवको गाडीमा भने ४ लाख ८७ हजार रुपैयाँ नगद भेटिएको थियो। उनिसहित गाडी र अरु पाँचजनालाई प्रहरीले नेपाल-भारत सिमानानजिकैबाट पक्राउ गरेको हो।

चौधरी भने नियमित सुरक्षा जाँचका क्रममा पक्राउ गरेका हुन्। उनि सवार गाडी रोकेर चेकजाँच गर्दा केही शंकास्पद वस्तुहरु फेला परेको थियो। उनिसहित अरु चारजना पनि प्रहरीले नियन्त्रणमा राखेको छ।