भारतीय प्रधानमन्त्री नरेन्द्र मोदीले राष्ट्रिय स्वतन्त्र पार्टीलाई बधाई र शुभकामना दिएका छन्। फागुन २१ गते भएको प्रतिनिधिसभाको निर्वाचनमा ‘अभूतपूर्व’ परिणाम ल्याएको रास्वपा देशको पहिलो पार्टी बनेको छ।

निर्वाचनको अन्तिम परिणाम आएसँगै भारतीय प्रधानमन्त्री मोदीले पार्टीका सभापति रवि लामिछाने र वरिष्ठ नेता बालेन साहलाई टेलिफोन गरेर बधाई र शुभकामना दिएका हुन्।

मोदीले दुवै नेतालाई टेलिफोनमार्फत बधाई र शुभकामना दिएको दुई देशको पारस्परिक सम्बन्धलाई अझ मजवुत बनाउन सँगै काम गर्न उत्सुक रहेको इच्छा व्यक्त गरेको बताएका छन्।

‘राष्ट्रिय स्वतन्त्र पार्टी अध्यक्ष रवि लामिछाने र वरिष्ठ नेता बालेन्द्र शाहसँग न्यानो टेलिफोन वार्ता भयो। दुवै नेताहरूलाई उनीहरूको चुनावी विजय र नेपालको चुनावमा रास्वपाको शानदार सफलताको लागि बधाई दिएँ’ मोदीले सामाजिक सञ्जालमा लेखेका छन् ‘नयाँ सरकारको लागि उनिहरूलाई शुभकामना व्यक्त गर्दै दुई देशबीचको पारस्परिक समृद्धि, प्रगति र कल्याणका लागि सँगै काम गर्ने भारतको प्रतिवुद्धता व्यक्त गरेको छ।’

मोदीले आगामी दिनमा पनि दुवै देशको संयुक्त प्रयासमा नेपाल भारतको सम्बन्ध थप नयाँ उचाइँमा पुग्ने विश्वास पनि व्यक्त गरेका छन्।