राष्ट्रिय स्वतन्त्र पार्टी (रास्वपा) सभापति रवि लामिछानेको मुद्धामा बहस सकिएको छ।

लामिछानेको सम्पत्ति शुद्धीकरण र संगठित अपराधसम्बन्धी अभियोग पत्र संशोधन गर्ने महान्यायाधीवक्ता कार्यालयको निर्णयविरुद्ध परेको रिटमा न्यायाधीशद्वय सुनीलकुमार पोखरेल र सारंगा सुवेदीको इजलासमा बहस सकिएको थियो।

रविको मुद्धामा गत चैत १ गतेदेखि बहस जारी थियो। बिहीबार निवेदकतर्फको जवाफी बहस सकिएको हो। अब फैसलाको प्रतीक्षा सुरु भएको छ।

महान्यायाधिवक्ता सविता भण्डारीले गत पुस ३० गते लामिछानेविरुद्ध कास्की, काठमाडौं, रुपन्देही र पर्सा जिल्ला अदालतमा दायर मुद्दाहरूमा संगठित अपराध र सम्पत्ति शुद्धीकरणको दाबी हटाउने गरी अभियोगपत्र सच्याउने निर्णय लिएकी थिइन्।

महान्यायाधीवक्ताको निर्णय बदरको माग गर्दै वरिष्ठ अधिवक्ता दिनेश त्रिपाठी, कानूनका विद्यार्थी आयुष बडाल र अदालती अभियन्ता युवराज पौडेल सफलले रिट दायर गरेका थिए।

रिट निवेदकको तर्फबाट वरिष्ठ अधिवक्ता टीकाराम भट्टराई, दिनेश त्रिपाठी लगायतले बहस गरेका छन्। लामिछानेको तर्फबाट वरिष्ठ अधिवक्ता सुशील पन्तको टोलीले बहस गरेको छ।