नेपाली काँग्रेसको केन्द्रीय समिति बैठक आज बस्दैछ। यो बैठकको अध्यक्षता सभापति गगनकुमार थापाले गर्नेछन्।

यसअघि उनले निर्वाचनमा पराजयको नैतिक जिम्मेवारी लिँदै पदबाट राजीनामा दिएका थिए। तर काँग्रेसले उनको राजीनामा अस्विकृत गरिसकेको छ। शुक्रबार र आइतबार बसेको केन्द्रीय समिति बैठकले उनको राजीनामा अस्वीकृत गरेको थियो।

त्यसपछि आज दिउँसो बस्ने बैठक उनले अध्यक्षता गर्नेछन्। सर्लाही ४ बाट निर्वाचन लडेका थापालाई राष्ट्रिय स्वतन्त्र पार्टीका अमरेशकुमार सिंहले पराजित गरेका थिए। नेपाली काँग्रेसले यसपालि देशभरि नै अपेक्षित परिणाम ल्याउन नसकेपछि सभापति थापाले राजीनामा दिएका थिए।

आजको बैठकमा आगामी नियमित महाधिवेशनका बारेमा पनि छलफल हुने भएको छ। गत पुस अन्तिम साता विशेष महाधिवेशनमार्फत सभापति चुनिएका थापाले वैशाखमै नियमित महाधिवेशन गर्ने घोषणा गरेका थिए। तर अहिले समय अपुग भएको भन्दै उक्त महाधिवेशन असोजसम्म गर्नेबारे पनि आजको केन्द्रीय समितिमा छलफल हुनेछ।