नेकपा एमालेका अध्यक्ष केपी शर्मा ओलीले संसदमा नेपाली कांग्रेसले असभ्य व्यवहार गरेको बताएका छन्।

शुक्रबार संसद भवन परिसरमा सञ्चारकर्मीलाई प्रतिक्रिया दिँदै उनले कांग्रेसले उत्ताउलोपन देखाएर सत्तापक्ष बसेको ठाउँमा आएर मन्त्रीको रोभित्र छिरेकाे बताए।

अध्यक्ष ओलीले कांग्रेसका सांसदहरुले अपशब्द प्रयोग गरेको समेत बताए।

‘भिडन्त भएन, कांग्रेसहरुले उत्ताउलोपन देखाएर हामी बसेको ठाउँमा आएर मन्त्रीको रोभित्र छिर्ने, म बसेको ठाउँमा आउने अनि अनेक अपशब्द बोल्ने। यो खालको सभ्य व्यवहार भएन। म आफ्नो ठाउँमा बसेको थिएँ। सरकारबाट मैले हटाइदिएको भन्ने आरोप लगाएको होला’, उनले भने।

बिहीबारको बैठकमा उपप्रधान एवं गृहमन्त्री रवि लामिछानेलाई संसदमा बोल्न सभामुख देवराज घिमिरेले समय दिएसँगै कांग्रेसले रोष्टममा जान नदिएपछि अध्यक्ष ओलीसमेत उठेर कांग्रेस सांसदहरुको विरोध गरेका थिए।