सर्वोच्च अदालतको प्रधानन्यायाधीश नियुक्ति प्रक्रिया अघि बढाउन संवैधानिक परिषद्को बैठक आह्वान बोलाइएको छ।

संवैधानिक परिषद्का अध्यक्षसमेत रहेका प्रधानमन्त्री बालेन्द्र शाहको निर्देशनअनुसार परिषद् सचिवालयले बिहीबारका लागि बैठक बोलाएको हो।

संवैधानिक परिषद्को सचिवालयले बुधबार जारी गरेको पत्रअनुसार बैठक ०८३ वैशाख २४ गते बिहीबार अपराह्न ५:०० बजे प्रधानमन्त्री तथा मन्त्रिपरिषद्को कार्यालय, सिंहदरबारमा बस्नेछ। बैठकको मुख्य कार्यसूची ‘प्रधानन्यायाधीशको नियुक्ति सिफारिस’ रहेको छ।

बैठकमा सहभागी हुनका लागि सभामुख डोल प्रसाद अर्याल, राष्ट्रिय सभाका अध्यक्ष नारायणप्रसाद दाहाल, कानुन, न्याय तथा संसदीय मामिला मन्त्री सोविता गौतम, प्रतिनिधि सभाका विपक्षी दलका नेता भीष्मराज आङ्देम्बे र प्रतिनिधि सभाकी उपसभामुख रुवी कुमारीलाई आमन्त्रण गरिएको छ।

राष्ट्रपतिबाट संवैधानिक परिषद्‍सम्बन्धी अध्यादेश जारी भएसँगै संवैधानिक पदहरूमा नियुक्ति सिफारिसका लागि परिषदको बैठक बोलाइएको हो। 

हाल प्रधानन्यायाधीश, प्रमुख निर्वाचन आयुक्त, अख्तियारका आयुक्त लगायतका संवैधानिक पदाधिकारी पद रिक्त छन्।

परिषदले संवैधानिक पदहरूमा नियुक्तिका लागि सिफारिस गरेपछि संसदीय सुनुवाइ प्रक्रिया पूरा गरेपछि राष्ट्रपतिले नियुक्त गर्ने कानुनी व्यवस्था छ।

प्रधान न्यायाधीश नियुक्त भएपछि बाँकी संवैधानिक पदहरू पूर्ति गरिनेछ। अन्य संवैधानिक पदहरू सिफारिस गर्ने संवैधानिक परिषद्‍मा कानुनमन्त्रीको ठाउँमा प्रधान न्यायाधीश सदस्य रहने छन्।