कोशी प्रदेश सरकारले ८ महिनादेखि नेतृत्वविहीन रहेको कोशी प्रदेश खेलकुद विकास बोर्डका पदाधिकारी अध्यादेशमार्फत ऐन संशोधन गरी नियुक्त गरेको छ।

सत्तारुढ दल एमाले र कांग्रेसबीच भागबण्डा मिलाउन अध्यादेशमार्फत ऐन संशोधन गरेर बोर्डका पदाधिकारी र सदस्य नियुक्त गरिएको हो।

बुधबार राति सामाजिक विकास मन्त्री रामप्रसाद महतोले बोर्डमा एक जना उपाध्यक्ष र सदस्यसहित सचिव एमालेबाट ५ सदस्य र कांग्रेसबाट उपाध्यक्षसहित ६ जनालाई नियुक्त गरेका छन्।

बोर्डको सदस्यसचिवमा एमाले कोटामा इनरुवाका विप्लव घोष र महिला उपाध्यक्षमा एमाले नेतृ विराटनगरकी सन्तोषी श्रेष्ठ नियुक्त भएकी छन्। 

पुरुष उपाध्यक्ष कांग्रेस कोटाबाट वसन्त अर्याल नियुक्त भएका छन्।

बोर्डको सदस्यमा विराटनगरकी बीना बस्नेत, केशव भट्टराई र किशोरविक्रम साह, टीकाराम पुरी, दुर्गा कठायत र बालजित राई नियुक्त भएका छन्। पदाधिकारी तथा सदस्यहरूको कार्यकाल ४ वर्षको हुनेछ।

तत्कालीन सदस्यसचिव पर्शुराम बस्नेतको पदावधि सकिएपछि बोर्ड नेतृत्वविहीन थियो।

ऐनमा उपाध्यक्ष र सदस्यसचिवसहित सदस्यको संख्या १५ जना रहने व्यवस्था थियो। तर, दुई दलबीच भागबण्डाका लागि ३० वैशाखमा प्रदेश खेलकुद पहिलो संशोधन अध्यादेश–२०८१ मार्फत ऐन संशोधन गरी एक जना उपाध्यक्ष थपिएको थियो। र सदस्यको संख्या पनि २५ पुर्‍याइएको थियो।