भिजिट भिसामा विदेश जान लागेका नेपाल एयरलाइन्सका ग्राउन्ड इक्युपमेन्ट अपरेटर त्रिभुवन अन्तर्राष्ट्रिय विमानस्थलबाट ५४ लाख ७१ हजार रुपैयाँसहित पक्राउ परेका छन्।

सुनसरी गढी गाउँपालिका–१ घर भई हाल काठमाडौंको बनस्थली बस्ने कमलनारायण विश्वासलाई त्रिभुवन अन्तर्राष्ट्रिय विमानस्थल सुरक्षा कार्यालयले पक्राउ गरेको हो।

सोमबार राति साढे ८ बजे बाटिक एयरको फ्लाइटमार्फत भिजिट भिसामा मलेसियाको क्वालालम्पुर प्रस्थान गर्ने क्रममा विमानस्थल प्रहरीद्वारा जाँच गर्दा उनको लगेजमा फलामको कराईभित्र लुकाएर लैजाँदै गरेको अवस्थामा विभिन्न देशका मुद्रा भेटिएको हो।

१६ वर्षदेखि नेपाल एयरलाइन्समार्फत त्रिभुवन अन्तर्राष्ट्रिय विमानस्थलभित्र  ग्राउन्ड इक्युपमेन्ट अपरेटरमा कार्यरत उनी अहिलेसम्म २६ पटक बाह्य मुलुलक यात्रा गरेको खुलेको छ।

प्रहरीले उनको साथबाट ४ लाख ७१ हजार ६८९ रुपैयाँ ३२ पैसा बराबरको नेपाली, अमेरिकी, ओमानी, पाकिस्तानी, मलेसियन, श्रीलंकन, जापानिज, अफ्रिकन मुद्रा बरामद गरेको हो।