अख्तियार दुरुपयोग अनुसन्धान आयोगले ई–पासपोर्ट खरिद प्रकरणमा अनुसन्धानको लागि तत्कालीन परराष्ट्रमन्त्री डा.आरजू राणा देउवालाई पत्र लेखेको छ।

अख्तियारले राणालाई ३ दिनभित्र उपस्थित भएर बयान दिन पत्र काटेको अख्तियार स्रोतले बतायो। यद्यपि हङकङमा रहेकी राणाले तत्काल उपस्थित हुन नसक्ने, नेपाल फर्किएपछि हाजिर हुने पत्र इमेलमार्फत पठाएको खुलेको छ।

राणालाई तत्कालीन विभागीय मन्त्रीको हैसियतमा उक्त प्रकरणमा संलग्नताबारे बयान दिन बोलाइएको हो।

प्रधानमन्त्री बालेन्द्र शाहले अख्तियारका पदाधिकारीहरूलाई सिंहदरबार बोलाएर कडा निर्देशन दिए लगत्तै आरजुका नाममा पूर्जी काटिएको अख्तियारका एक अधिकारीले बताए।

सीमित कम्पनीलाई लाभ मिल्ने गरी टेन्डर आह्वान गरेर अनियमितता गरेको अभियोगमा अख्तियारले राहदानी विभागका महानिर्देशक, निर्देशक, जर्मन कम्पनीका नेपाली एजेन्टसहित ४ जनालाई पक्राउ गरेर अनुसन्धान गरिरहेको छ।

केही व्यक्तिहरू फरार रहेको अख्तियारले बताएको छ।