अर्थमन्त्री डा. स्वर्णिम वाग्लेले मध्यपूर्वको द्वन्द्व समाधान उन्मुख देखिएकोले अब डिजेल, पट्रोललगायतका इन्धनको मूल्य अब घट्ने बताएका छन्।

आइतबार प्रतिनिधिसभा बैठकमा आर्थिक विधेयक, २०८३ माथि सांसदहरूले उठाएका प्रश्नको जवाफ दिने क्रममा उनले मध्यपूर्वको द्वन्द्वले बढेको पेट्रोलियम पदार्थको मूल्य अब घट्ने बताएका हुन्।

अन्तर्राष्ट्रिय बजारमा कच्चा तेलको मूल्य घटे पनि भारतीय आयल निगममार्फत उक्त इन्धन आउन बाँकी रहेकाले हालसम्म त्यसको मूल्य घटाउने अवस्था नरहेको बताए।

वाग्लेले आफू अर्थमन्त्री हुने बित्तिकै उक्त इन्धनको मूल्य घटाउनका लागि पहल गरेको दाबी समेत गरे।

उनले भने, ‘अहिले मध्यपूर्वको अवस्था सहज हुँदै गयो। अब टाइम ल्याक त हुन्छ। क्रुड प्राइस त घटी नै सक्यो। भारतीय आयल निगममार्फत हामीले जुन इन्धन आयात गर्ने गरेका छौं। त्यो एडजस्ट भएर नेपालमा आउन केही समय लाग्ला। तर मूल्य अब घटनेवाला छ।’