सुदूरपश्चिम प्रदेशका मुख्यमन्त्री कमल बहादुर शाह ट्राफिक प्रहरीको कारबाहीमा परेका छन्।

मुख्यमन्त्री शाहले हेल्मेट विना नै मोटरसाइकल चलाएको भिडियो बाहिरिएपछि ट्राफिक प्रहरीले निवासमै पुगेर उनलाई जरिवाना तिराएको हो।

मुख्यमन्त्री शाहले निवास परिसरमा हेल्मेट नलगाइ बुलेट बाइक चलाएको भिडिओ सामाजिक सञ्जालमा पोष्ट भएको थियो। शाहलाई पाँचसय रूपैयाँ जरिवाना गरिएको छ।

बिहीबार नै पत्रकार सम्मेलन गर्दै मुख्यमन्त्री शाहले आफूले ट्राफिक नियम उल्लङ्घन गरेको स्वीकार गरेका छन्। आफूले नै नियमअनुसार कारबाही गर्न ट्राफिक प्रहरीलाई आग्रह गरेको शाहको दाबी छ। 

कानून सबैलाई बराबरी हुनुपर्छ भन्ने उद्देश्य अनुसार आफूले ट्राफिक प्रहरीलाई जरिवाना काट्न आग्रह गरेको उनले बताए।

मुख्यमन्त्रीका प्रमुख स्वकीय सचिव प्रयागराज खनालले आफ्नो टिकटकबाट शाहले हेल्मेटबिना बाइक चलाएको भिडिओ सार्वजनिक गरेका थिए।