अख्तियार दुरुपयोग अनुसन्धान आयोगले पूर्वप्रधानमन्त्रीद्वय शेरबहादुर देउवा र पुष्पकमल दाहाल प्रचण्डका स्वकीय सचिवहरूको सम्पत्तिमाथि अनुसन्धान थालेको छ।

देउवाका स्वकीय सचिव भानु देउवा र प्रचण्डकी स्वकीय सचिव एवं छोरी गंगा दाहालको परिवारको सम्पत्तिमाथि अख्तियारले अनुसन्धान सुरु गरेको हो।

अख्तियारले भानु देउवाको सम्पत्ति अनुसन्धानका लागि १३ पाने फारम भराइसकेको स्रोतले बतायो। देउवाको सम्पत्तिबारे अख्तियारमा उजुरी परेपछि अनुसन्धान अधिकृत तोकेर उनको परिवारका नाममा रहेको सम्पत्तिको छानबिन सुरु भएको हो।

भानु देउवाको बैंक खाता विवरणदेखि जग्गा र शेयरहरूको लगत विवरण मगाउने काम चलिरहेको अख्तियार स्रोतले बतायो। देउवाले आफन्तको नाममा समेत सम्पत्ति लुकाएको हुनसक्ने आशंकामा अनुसन्धान थालेको छ।

यता प्रचण्डपुत्री गंगा दाहालको परिवारको सम्पत्तिमाथि पनि अनुसन्धान थालेको छ। उनीसँगै श्रीमान जीवन आचार्यको सम्पत्तिमाथि अनुसन्धान एकैसाथ अघि बढाएको हो। गंगा तत्कालीन प्रधानमन्त्री प्रचण्डकी स्वकीय सचिव थिइन्। पति आचार्य कोशी प्रदेशसभाका सदस्य एवं कोशी प्रदेश सरकारका पूर्वमन्त्रीसमेत हुन्।

पूर्वप्रधानमन्त्री केपी ओलीका स्वकीय सचिव राजेश बज्राचार्यको सम्पत्तिमाथि अख्तियारले यसअघि नै अनुसन्धान सुरु गरिसकेको छ।