नेकपा (माओवादी केन्द्र)का अध्यक्ष पुष्पकमल दाहाल (प्रचण्ड) उपमहासचिव वर्षमान पुनलाई साथ लिएर पूर्वी पहाडी जिल्ला तेह्रथुम भ्रमणमा जाँदैछन्।

सैनिक हेलिकोप्टरमा तेह्रथुम जान लागेका उनीहरू सोमबार (आज) र मंगलबार तेह्रथुमका तेह्रथुमका विभिन्न स्थानमा आयोजित कार्यक्रममा सहभागी हुने प्रचण्डको सचिवालयले जनाएको छ।

आज लालीगुराँस नगरपालिका-७ लसुनेस्थित शहीद धनरुपा पार्कको उदघाटन गरेर उनी एमाले अध्यक्ष केपी शर्मा ओलीको जन्मथलो आठराई जाने र आठराई-३ ह्वाकु बगाले शहीद स्मृति पार्क र जनयुद्ध तथा शान्ति संग्रहालय भवनको शिलान्यास गर्ने कार्यक्रम छ।

मंगलबार बिहान आठराई-६ मा स्वर्गीय माओवादी नेता भक्तराज कन्दङवाका परिवारसँग भेटघाट गर्ने र प्रचण्डले कन्दङवाको शालीक अनावरण गर्ने कार्यतालिका रहेको उनको सचिवालयले जनाएको छ।

तेह्रथुमका कार्यक्रम सकेर उनीहरू मंगलबार नै काठमाडौं फर्किने सचिवालयले जनाएको छ।