नेकपा (माओवादी केन्द्र) निकट विद्यार्थी संगठन अखिल (क्रान्तिकारी)को मतगणना पार्टीको केन्द्रीय कार्यालय पेरिसडाँडामा जारी छ।

मतपेटिका पेरिसडाँडा लैजाने विषयमा विवाद हुँदा मतगणना प्रभावित भएको थियो। भृकुटीमण्डपस्थित वाल्मीकि क्याम्पसमा मतदान भएको चार दिनपछि मंगलबार साँझ मतपेटिका पार्टी केन्द्रीय कार्यालय पुर्‍याइएको थियो।

मंगलबार रातिदेखि उपत्यका विशेष र विश्वविद्यालय विशेष प्रदेशको मतगणना सुरु भएको थियो।

अहिले उपत्यका विशेष प्रदेशतर्फ सचिवहरूको मतगणना भइरहेको र सचिवको सकिएपछि क्रमशः उपमहासचिव, महासचिव, उपाध्यक्ष र अध्यक्षको मतगणना हुनेछ।

सात प्रदेशको मतगणना सकिँदा अध्यक्षमा विजय प्रकाश सापकोटा र हेमन्त राईबीच कडा प्रतिस्पर्धा देखिएको छ। सापकोटाले ४८५ पाउँदा राईले ४६१ मतले पाछ्याइरहेका छन्।

विवादित बनेको वाल्मीकिको ५२२ मत नै निर्णायक हुने देखिएको छ।