नेपाल प्रहरीको टोली भारतको ओडिसा राज्यस्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा नेपाली विद्यार्थीको सुरक्षाका लागि पुगेको छ।

नेपाल प्रहरीका दुईजना वरिष्ठ अधिकारी नेपालीको सुरक्षा व्यवस्थाको समन्वयका लागि विद्यालय पुगेको परराष्ट्रमन्त्री आरजु राणा देउवाले जानकारी दिइन्।

परराष्ट्रमन्त्रीले भनिन्, ‘नेपाली विद्यार्थीको अवस्था बुझ्न र त्यहाँ रहेका नेपाली विद्यार्थीलाई कलेजमा सुरक्षाको वातावरण मिलाउने सन्दर्भमा नेपाली राजदूताबास नयाँ दिल्लीबाट नेपाल प्रहरीका दुइजना बरिष्ठ अधिकारी आज बिहानै विश्वविद्यालय पुग्नुभएको छ।’

उनले आफूले फोन गरेर घटनाको आवश्यक अनुसन्धानका लागि भारतीय सुरक्षाकर्मीसँग समन्वय गर्न तथा नेपाली विद्यार्थीलाई आवश्यक सहयोग र होस्टलमा सुरक्षित रूपमा रहनका लागि विश्वविद्यालय प्रशासनसँग समन्वय गर्न निर्देशन दिएको बताएकी छन्।

‘यस विषयमा नेपाली दूतावास दिल्लीले आवश्यक पहल गरिरहेकै छ। हिजोको कूटनीतिक प्रयासपछि कलेजले विद्यार्थीहरूलाई होस्टेलमा फर्कन अपिल गरिसकेको छ भने नेपाली विद्यार्थीलाई दुर्व्यवहार गर्ने स्टाफलाई कारबाही गरिसकिएको जानकारी पनि विश्वविद्यालयले सार्वजनिक सूचना मार्फत गराएको छ।’

यस विषयमा परराष्ट्र मन्त्रालय र नेपाली राजदूतावास दिल्लीले विश्वविद्यालय प्रशासन र भारतीय सुरक्षा अधिकारीको सम्पर्कमा रहेर आवश्यक समन्वयका साथ काम गरिरहेका राणाले बताइन्।

आइतबार विश्वविद्यालयको होस्टेलमा बुटवलकी प्रकृती लम्साल शंकास्पद रुपमा मृत भेटिएकी थिइन्। घटनाको सत्यतथ्य छानबिनको माग गर्दा करिब ५०० नेपाली विद्यार्थीहरूलाई कुटपिट गर्दै क्याम्पसबाट निष्कासन गरेपछि सर्वत्र विरोध भइरहेको छ।