प्रधानमन्त्री केपी शर्मा ओलीसँगको भेटमा भारतीय विदेश सचिव विक्रम मिस्रीको उपरखुट्टी बसाइप्रति टिकाटिप्पणी सुरु भएको छ।

सत्तारुढ दल एमालेकै सांसद दयालबहादुर शाहीले प्रधानमन्त्रीसँगको भेटका क्रममा भारतीय विदेश सचिवको बस्ने तरिकाप्रति आपत्ति जनाएका छन्।

मिस्रीको ओलीको अगाडि उपरखुट्टीवाला तस्बिर सामाजिक सञ्जालमा सेयर गर्दै शाहीले असन्तुष्टि पोखेका हुन्।

उनले भारत संस्कारको हिसाबले कंगाल भएको हो त? भन्दै प्रश्नसमेत गरेका छन्।

उनले भनेका छन्, ‘यस्तो उपरखुट्टी ब्युरोक्रेसी यूएसए र रुस जस्ता महाशक्तिसँग पनि  छैन। के भारत युरोप र अमेरिकाभन्दा संस्कारको हिसाबले पनि कंगाल हो त?’

परराष्ट्र सचिव अमृतबहादुर राईको निमन्त्रणामा नेपालको दुईदिने औपचारिक भ्रमणका लागि आइतबार काठमाडौं आइपुगेका मिस्रीले उच्चस्तरीय राजनीतिक भेटवार्ता थालिसकेका छन्।

प्रधानमन्त्री ओलीलाई भेटेर भारतीय समकक्षी मोदीले पठाएको भारत भ्रमणको निमन्त्रणापत्र हस्तान्तरण गरेका मिस्रीले आजै राष्ट्रपति रामचन्द्र पौडेलसँग पनि शिष्टाचार भेट गरिसकेका छन्।