वर्तमान सरकार, सबैभन्दा बलियो र स्थिर सरकार भएको अर्थमन्त्रीको दाबी

अर्थमन्त्री विष्णु पौडेलले वर्तमान सरकार, सबैभन्दा बलियो र स्थिर सरकार भएको दाबी गरेका छन्।

आइतबार काठमाडौंमा आयोजित ट्रेकिंग एजेन्सिज एसोसिएसन अफ नेपाल (टान)को ४७औं वार्षिक साधारणसभामा बोल्दै उनले अहिलेको संसदीय अंक गणितभित्र वर्तमान सरकारभन्दा बलियो र स्थिर सरकार अर्को हुनै नसक्ने दाबी गरे।

मन्त्री पौडेलले इतिहास, योगदान र भविष्य भएको ठूला दुई दल मिलेर वर्तमान सरकार बनेको हुनाले उक्त सहकार्य ०८४ को निर्वाचन सम्म नै जाने पनि बताए।

उनले भने, ‘अहिलेको जस्तो स्थिर अर्को कुनै हुनै सक्दैन। हामीले यसबीचमा राजनीतिक स्थिरताको सुनिश्चित गरेको छौं। अब सरकार कहिले फेरिन्छ भन्ने आशंका र द्विविधाबाट निस्केका छौं। इतिहास, योगदान र भविष्य भएको ठूला दुई दल मिलेर बनेको यो सहकार्य ०८४ को निर्वाचन सम्म नै जान्छ।’

सरकारले पर्यटन प्रवर्द्धनको क्षेत्रमा नीति, कार्यक्रम र बजेटको माध्यमबाट महत्वपूर्ण कार्यक्रमको घोषणा गरेको बताउँदै त्यसतर्फ नै सरकारको ध्यान गएको उनले बताए। पर्यटन प्रवर्द्धनको लागि सरकारले कुनै कसर बाँकी नराख्ने मन्त्री पौडेलले आश्वासन दिए।

‘अहिलेको सरकारले पर्यटन प्रवद्धनको क्षेत्रमा नीति कार्यक्रम र बजेटको माध्यमबाट महत्वपूर्ण कार्यक्रमको घोषणा गरेको छ, त्यसतर्फ नै सरकारको ध्यान छ। पर्यटन प्रवद्र्धनको लागि सरकारले कुनै कसर बाँकी राख्दैन्। पर्यटन प्रवर्द्धनको लागि सरकारले चाल्नुपर्ने हरेक कदमहरू चाल्ने छ। गर्नु पर्ने के छ सबै गर्छ।’

पर्यटन क्षेत्रमा ट्याक्स छुटभन्दा व्यवसाय प्रवर्द्धनको लागि प्रस्ताव लिएर आउन सुझाव दिँदै उनले प्रस्ताव सम्बोधन गर्न सरकार आतुर रहेको धारणा राखे।

उनले भने, ‘ट्याक्सको कुरा मा जताततै छुट गर्दै जाने हो भने राज्य चलाउ हुन सक्दैन। साधारण खर्चसम्म धान्न सकिँदैन। विकासको लागि राजस्व परको कुरा हो। साधारण खर्चको लागि पनि धौ–धौ पर्ने खर्चमा हामी छौं भने ट्याक्स छुट गरेर राज्य चलाउने कसरी? त्यसैले ट्याक्स छुट भन्दा पनि व्यवसाय प्रवर्द्धनको लागि तपाईंहरूको प्रस्ताव के हुन्छ? सरकारले के गर्न सक्छ प्रस्ताव लिएर आउँनुहोस्। सम्बोधन गर्न सरकार आतुर छ।’